Dende esta ventá, a ventá da Sección de Adquisicións, queremos desexarvos Feliz Aninovo.
Tamén queremos agradecervos a vosa compaña ó longo deste tempo.
Temos pasado ratos moi entretidos, divertidos, entrañables... facendo os nosos posts e lendo os vosos comentarios, pero, témolo que deixar. O 2010 será ano de oposicións (?) e temos que adicarnos a outras cousas.
Pode non ser unha despedida, senon un "deica logo" , pero mentras sigamos aquí, seguiremos mercando libros (e seguiremos en twitter).
Axudar as persoas que viven do reciclaxe do cartón e dar a coñecer a literatura latinoamericana actual por medio de libros elaborados de forma artesanal é o fin do proxecto editorial das cartoneiras. As editoriais cartoneiras nacen en Buenos Aires no ano 2003 con Eloísa Cartonera, e a partir de aí expándense por toda Latinoamérica producindo libros artesanais e únicos a partir de materiais reciclados proporcionados polos cartoneiros; o contido do libro inclue obras de escritores pouco coñecidos, traducións de autores extranxeiros ou obras de escritores de prestixio que renuncian ós seus dereitos de autor a favor deste proxecto.
O proxecto chega á Universidade de Vigo da man de varios membros da Facultade de Filoloxía e Tradución que participaron no IV Simposio Roa Bastos de Literatura na Universidade Federal de Santa Catarina (Brasil) onde estableceron contacto con representantes de Katarina Kartonera.
Na Biblioteca da Facultade de Filoloxía podedes ver unha pequena mostra destes interesantes libros e coñecer algo máis deste novedoso proxecto. Achegádevos.
Aínda que poida resultar chocante, a Universidade de Oviedo conseguiu combinar ciencia e poesía a través das imaxes microscópicas obtidas por científicos desta Institución, que pola súa beleza inspiraron a súa unión cós versos escritos por grandes representantes da poesía española e latinoamericana.
Frei Luis de León, Cervantes, Machado, Borges, Lorca, Neruda... teñen o seu espazo nestas páxinas cheas de movemento, cor, sensacións, arte...
Hipatia xa "existía" na BUV antes de que Amenábar a "descubrira"…
Cando está a punto de estrearse ÁGORA, a esperada película de Alejandro Amenábar, dende a Biblioteca Universitaria queremos prepararte para a súa estrea.
Hipatia de Alexandría está considerada a primeira muller científica da historia. Nada menos. Educada na ciencia polo seu pai, o filósofo e matemático Teón de Alexandría, dedicou a súa vida á astronomía, a filosofía, as matemáticas...
Froito diso foron os seus extensos traballos (destruídos, pero amplamente citados) sobre álgebra ou xeometría... a súa revisión de teorías doutros grandes matemáticos como Euclides, ou astrónomos como Tolomeo... Deseñou instrumentos como o astrolabio plano, que serve para medir a posición das estrelas, os planetas e o Sol, ou un hidroscopio que medía a presenza e nivel da auga...
Nun mundo dominado por homes, unha muller dedicada á investigación e á difusión dos seus coñecementos.
O enfrontamento entre relixión e ciencia, paganismo e cristianismo en auxe, arrastrárona a unha morte cruel á mans de cristiáns fanáticos que non aceptaron a súa negativa a converterse ao cristianismo.
A destrución da Biblioteca de Alexandría, centro do saber e o coñecemento, se ben non coincide historicamente, si é parte esencial desta película… e tamén do fondo da Biblioteca Universitaria de Vigo na que podes encontrar todo o que necesitas para PREPARARTE PARA A ESTREA :
Ademais de obras relacionadas coa historia, as relixións, as loitas relixiosas, , a intolerancia, o fanatismo, as mulleres científicas, a filosofía, a historia da ciencia, das matemáticas, a astronomía, o Imperio Romano...
E xa postos, se te apetece ver UNHA DE ROMANOS, bótalle unha ollada a esta lista e ao noso catálogo. Temos unhas cantas.
Posts e documentos de mercandolibros relacionados:
Acaba de chegar á Biblioteca unha obra moi especial: Dewey Lee Más Libros.
Conta a historia real, conmovedora e divertida, acontecida nunha pequena vila de Iowa, cando a bibliotecaria Vicky Myron encontra un pequeno gato alaranxado metido na caixa de correo de devolución de libros. O gato Dewey, convertido co tempo nun empregado máis da biblioteca, protagoniza as páxinas deste libro coas súas 7 vidas que sumaron máis de 19 anos entre libros, usuarios e bibliotecarios aos que adoraba e que o adoraban.
Dende o blog mercandolibros queremos dar a benvida ao curso 2009-2010 aos alumnos, PDI e PAS da Universidade de Vigo. A nosa especial benvida aos máis de 2.200 alumnos que este curso empezan 1º nalgún dos novos graos adaptados ao Plan Bolonia e a todos os que se estrean na nosa Universidade; a eles principalmente queremos presentarnos.
En mercandolibros intentamos informar sobre as últimas adquisicións e novedades bibliográficas chegadas á Sección de Adquisicións, facernos eco das actividades relacionadas co mundo do libro e as bibliotecas, buscamos tamén un espazo para o ocio e a divulgación e, sobre todo, intentamos difundir a colección da Biblioteca Universitaria e mostrarvos o que a biblioteca pode ofrecervos.
Nas diferentes bibliotecas da UVigo encontraredes todo tipo de material relacionado coas vosas áreas de estudo, dende manuais básicos ata revistas e libros electrónicos...; a biblioteca ofrece acceso a internet, a bases de datos especializadas, conexión wifi...; contamos cunha importante colección de libros sobre técnicas de estudo e elaboración de traballos que poden servos de moita utilidade.
Na Sección de Adquisicións tramitamos ás solicitudes de compra do material bibliográfico seleccionado polos profesores, tanto para a súa investigación, como o recomendado en todas as materias impartidas nas diferentes titulacións. Aproveitamos para decirvos que xa está chegando ós vosos centros a bibliografía recomendada para este curso; non deixedes de consultala. E se queredes propoñer a compra dalgún libro podedes utilizar o buzón de suxestións.
Pero, como non todo é estudo, a Biblioteca tamén cubre a parte dedicada ao ocio: ¿sabes que podes encontrar películas, música, cómics, novelas, libros de fotografía, cine, arte, informática, guías de viaxes...?.
Axudarémoste a descubrilo; e para iso contamos coas compañeiras da Sección de Referencia que organizan sesións formativas nos diferentes Centros co fin de dar a coñecer a biblioteca, os servizos e os recursos que ofrece, así como introducirvos no manexo do catálogo. Non che perdas a sesión que se organiza na túa Facultade. Infórmate.
Queremos que coñezais todo aquilo que ofrece a biblioteca que, como vedes, é moito máis que postos de lectura agradables e silenciosos.
Podedes seguirnos en twitter, coñecer o noso primeiro álbum en flickr, consultar os nosos documentos en isuu ou slideshare... e por suposto participar connosco enviando os vosos comentarios e suxestións.
Vigo, porto pesqueiro de importancia mundial, arredor de cuxa actividade xurdiu un importante entramado de empresas relacionadas co sector naval, o comercio pesqueiro, a distribución, as conservas... é sede tamén de importantes institucións relacionadas coa investigación mariña: o Centro Oceanográfico de Vigo, do Instituto Español de Oceanografía ou o Instituto de Investigacións Mariñas, do CSIC son unha mostra disto. E por suposto, a Universidade.
Se ben a Universidade xa tiña asinados convenios de colaboración coa WFE, nesta ocasión estará presente a través da Estación de Ciencias Mariñas de Toralla (ECIMAT), contando cun posto en Aquafarming, onde se poderá coñecer a oferta científico-tecnolóxica da UVigo en acuicultura.
E dende a Biblioteca ofrecemos unha ampla selección de recursos para a aprendizaxe e a investigación nestes campos: na nosa colección bibliográfica, a pesca, a acuicultura e as materias relacionadas están amplamente representadas con obras que van dende interesantes estudos históricos ata as últimas investigacións publicadas en revistas especializadas. A través das bases de datos especializadas en ciencias mariñas e en acuicultura e a través do metabuscador Pórtico tedes acceso a múltiples recursos sobre estes temas.
Chegan as vacacións. Relaxádevos, esquecede os estudos e o traballo e... gozade do voso tempo libre. Recargade as vosas baterías viaxando, lendo, durmindo... en fin, como máis vos guste, pero dedicade un tempo á lectura. Durante os meses que levamos convosco fomos recomendando algunhas lecturas, informando a través do noso twitter de obras de interese que chegaban á Biblioteca... Participastes connosco coas vosas suxestións; entre tod@s elaboramos o xa groso "O Libro no Libro" do que hoxe publicamos unha nova actualización:
Hoxe queremos recordarvos todas estas obras que quixemos compartir convosco e suxerirvos algunha máis.
Alá polos anos 70 as nórdicas (principalmente as suecas) eran noticia en España ; hoxe volven á conquista, pero esta vez doutro xeito : a novela negra escrita por mulleres nórdicas empeza a difundirse no noso país e xa temos unha pequena mostra :
- Karin Fossum : para moitos a mellor representación feminina da novela policíaca escandinava.
Falamos de novela negra, de Suecia... ¿vos sona a algo? Vale, vos recomendaremos tamén a Stieg Larsson e a súa triloxía Millenium. Pero non podemos esquecer ó grande Henning Mankell e o recentemente traducido ó castelán Arnaldur Indridason coa súa novela "La mujer de verde".
E como algún de vós, Larssonmaníaco ou non, quererá coñecer Suecia (ou calquera outro país), a Biblioteca ofrece entre os seus fondos guías de viaxe que quizais vos resulten de utilidade para preparar as vosas visitas. Buscade no noso catálogo. E xa de paso que vos ides por aí, non olvidedes que segue aberto o noso álbum "Retratando libros" que por estas datas cumpre o seu primeiro ano.
Participa nesta iniciativa e fotografía libros, bibliotecas, lectores, librarías... calquera cousa que teña relación cos libros, e envíanolas a esta dirección : adquisicions@gmail.com ou blogdabiblio@uvigo.es . De momento non pensamos en premios, pero quizais se nos ocorra algo.
Tiñamos as de xornalistas, médicos (a centos), avogados, camioneiros, farmacéuticos, profesores, policias... pero, críamos que non había ningunha serie de bibliotecarios/as ?... Pois a hai: é australiana e comenzóu a emitirse no ano 2007 : The librarians : unha comedia con bibliotecarios e usuarios como protagonistas.
Pode que chegue algún día as nosas televisións; ou faremos unha "made in Vigo" ?.
O espazo da Biblioteca Central da Universidade de Vigo foi elixido polo equipo de página 2para gravar a presentación de dous dos seus programas. Entre os estantes que vedes na foto movíase o seu presentador Óscar Lópezavanzando o contido do que se emitirá este domingo. As que casualmente asistimos á gravación, coñecedoras deste espazo (o televisivo e o bibliotecario) sentímonos realmente encantadas coa presenza do equipo deste programa na nosa biblioteca, e ao tempo coa presenza da nosa biblioteca neste programa.
página 2é un programa de libros que emite a 2 os domingos ás 8:30. Orixinal, dinámico, actual... xeralmente realizan as súas presentacións dende algunha biblioteca española. Non é estraño que decidisen pasar por aquí; a Biblioteca Central (dos arquitectos A. Noguerol e P. Díaz) é realmente un espazo singular por dentro e por fóra, de feito, foi seleccionada para varios premios arquitectónicos, é un dos cinco edificios galegos incluídos no "Atlas Phaidon de arquitectura mundial contemporánea" ("The Phaidon Atlas of contemporary world architecture" e é lugar de visita de numerosos arquitectos, estudantes de arquitectura e curiosos.
En realidade, o Campus Lagoas-Marcosende (Vigo) é un catálogo de arquitectura contemporánea. Arquitectos de recoñecido prestixio deixaron e deixarán (xa hai proxectos) mostra da súa capacidade creadora, sempre intentando integrar a súa obra no espazo natural no que se sitúa. As opinións sobre o resultado son de todo tipo; como din que dicimos os galegos: "depende".
Aos que non coñezades isto invitámosvos a vir, a ser posible nun día luminoso (as vistas dende a azotea da Biblioteca son espectaculares). E se non podedes vir, pero vos interesa coñecer algo sobre o noso Centro e sobre o noso Campus aquí tedes unha mostra do que se ten publicado e que podedes atopar nas nosas bibliotecas (contamos para isto coa colaboración da Sección de Acceso ó Documento desta Biblioteca).
Por certo, no programa falarán co escritor Domingo Villar, do que tamén tedes algunha obra nesta Universidade.
¿Será así a biblioteca do futuro?. Xa é o presente en Seul : chámase DIBRARY(National Digital Library) e é a maior biblioteca dixital do mundo.
Os seus creadores a definen como "espacio multicultural". Nela o usuario ten acceso a unha base de datos con 380.000 libros e 116.000 documentos dixitalizados. 252 terminais, zona wifi con Internet gratis para traballar con ordenadores personais, salas para seminarios dotadas de ordenadores, impresoras..., estudios de vídeo e audio onde crear e editar... En fin, un lugar para obter e crear información DIXITAL.
Vótade unha ollada neste enlace e nesta entrevista ó seu director.
A Real Academia Galega adica o Día das Letras Galegas 2009 a Ramón Piñeiro, considerado un dos máis importantes representantes do galeguismo político e cultural. Mercando Libros quere achegarvos á súa vida e obra a través dun documentono que recollemos as obras de e sobre Ramón Piñeiro que se atopan na Biblioteca Universitaria de Vigo.
Continuando cos actos de conmemoración do 2º Centenario da Reconquista de Vigo, estase a celebrar na Casa Galega da Cultura o Ciclo de Conferencias "Cidades en guerra, 1808-1814: Galicia na Guerra da Independencia", organizado pola Sociedad Estatal de Conmemoraciones Culturales, coa colaboración do Concello de Vigo. Varias destas conferencias serán impartidas polos profesores da Universidade de Vigo: Rafael Vallejo Pousada, Luis Domínguez Castro e Gonzalo Méndez Martínez.
Os actos completaranse na Casa das Artes coa Exposición "Cidades en Guerra, 1808-1814: Vigo na Guerra da Independencia", comisariada por Rafael Vallejo e J. Francisco Fuentes, na que se dará unha visión militar, social e política deste feito histórico, mostrando máis de 170 pezas entre armas, planos, retratos, escenas de batallas, textos impresos e manuscritos...
Paralelamente, na Casa Galega da Cultura, e tomando o título da obra José Fernández y Neira, desenrolarase a Exposición "Proezas de Galicia : a Guerra da Independencia e a Reconquista na Biblioteca Penzol", onde poderemos ver arredor dun centenar de libros e documentos conservados na Biblioteca da Fundación Penzol, unha das máis ricas en fondo galego.
Se queredes saber máis sobre a Guerra da Independencia en Galicia remitímosvos a noso post do día 25 de abril "Reconquista de Vigo: 200 anos".
O Ano 2009 foi declarado pola ONU Ano Internacional da Astronomía.O 23 de abril foi declarado pola UNESCO Día do Libro. En Mercandolibros queremos unir estes dous acontecementos. Dende tempos remotos a astronomía foi un importante tema de observación e estudo, e diso fóronnos quedando vestixios, primeiro arqueolóxicos e despois escritos. A astronomía e as materias relacionadas con ela deron lugar a múltiples publicacións; ao igual que noutras áreas científicas, o Renacemento foi especialmente prolífico; o auxe da navegación a partir do século XV obrigou ao desenvolvemento de instrumentos e sistemas de navegación que potenciaron o estudo de materias como a cartografía, xeografía, astronomía... que quedaron plasmados en interesantes libros dende os que se contribuíu á desaparición da antiga visión xeocéntrica da Terra para pasar a desenvolver as modernas teorías heliocéntricas xa formuladas en Grecia por Aristarco de Samos. E disto temos exemplos na Biblioteca Universitaria que hoxe queremos presentarvos. Dentro do fondo de facsímiles da Biblioteca inclúense algúns estudos astronómicos realizados entre os séculos XV e XVII. Curiosos libros enriquecidos con debuxos, figuras móbiles, mapas do ceo de impresionante colorido...
Se ben isto é unha pequena mostra de tratados antigos, a BUV conta cun importante fondo de astronomía e materias relacionadas. Nesta guía encontraredes diversas materias a través das que podedes encontrar tanto obras de divulgación coma manuais, obras de referencia, revistas, biografías, vídeos, obras de investigación...
Desta forma, unímonos a ambas as dúas celebracións e facemos nosa modesta contribución á difusión da astronomía coa que a Universidade de Vigo está tan comprometida, como o demostra a súa participación en proxectos nacionais como "Una Universidad, Un Universo" que, coordinado pola profesora Ana Ulla Miguel, pretende achegar este campo a todos os públicos a través de conferencias nas 77 universidades españolas.
Hoxe Andersen cumpriría 204 anos, e dalgún xeito segue vivo. De orixe extremadamente humilde, saíu da miseria grazas ao seu enxeño e as súas boas relacións; cantante de ópera, bailarín... quixo ser outras cousas, pero sobre todo quixo ser escritor. Publicou poesía, novela, teatro, libretos de óperas..., pero en nada destacou tanto como nos seus contos; e son estes os que hoxe aínda lle manteñen vivo. Parte da súa vida dedicouna a viaxar; relataba as súas experiencias en crónicas xornalísticas e en libros de viaxes; unha das súas dúas viaxes por España levouno a publicar a obra "En España".
Coma se dun conto se tratase, a vida foi xenerosa con el; en 1866 recibe do Rei de Dinamarca o título honorífico de Conselleiro de Estado e en 1867 foi declarado ciudano ilustre da súa cidade natal, Odense. Hoxe en día varios premios literarios levan o seu nome e, case dous séculos despois aínda asistimos a novas edicións, adaptacións, obras de teatro, ballets, películas, xogos de ordenador, pinturas, esculturas... baseadas nas súas historias. O seu nome transcendeu incluso o noso Planeta: en 1976 o asteroide n.º 2476 foi bautizado Andersen en honor ao escritor danés.
E Andersen, como outros moitos autores de contos, está tamén representado nas nosas bibliotecas, con edicións en distintos idiomas, traducións ó galego, adaptacións, películas...
Vedes como hai contos na Biblioteca Universitaria?.
O sábado 28 de Marzo Vigo celebra os 200 anos da súa Reconquista. O Día da Reconquista, de longa tradición en Vigo, adquire este ano unha especial importancia ó celebrarse o Bicentenario da azaña dos vigueses contra as tropas francesas. O Concello de Vigo e a Asociación Veciñal Casco Vello teñen preparados varios eventos, como exposicións, representacións... Na páxina web reconquistadevigo.com hai abundante información sobre a historia e as actividades que se desenvolverán nestes días.
A Biblioteca Universitaria conta cun pequeno fondo sobre a Guerra da Independencia en Vigo que se pode completar, entre outras, coa abundante documentación depositada na Biblioteca Penzol de Vigo ou no Arquivo Municipal.
Por outra banda, unha ampla información sobre a Guerra da Independencia en Galicia, que inclue tanto monografías como artigos de revistas, atópase no Catálogo Galicia da Biblioteca da Universidade de Santiago de Compostela.
O feito da celebración do Bicentenario animou a moitas institucións a facerse eco deste acontecemento ; a Biblioteca Nacional elaborou unha completa páxina de recursos onde se pode atopar a Guerra da Independencia en diversos ámbitos coma o cine, a literatura, a arte, internet...
A Biblioteca Virtual Miguel de Cervantes, xunto có Ministerio de Defensa, súmanse a esta conmemoración cunha páxina web que recolle numerosas testemuñas escritas sobre o período de 1808 a 1814.
Recomendamos a lectura de dous artigos sobre o mundo do libro e os bibliotecarios. O primeiro fala dos cambios que están a acontecer no mundo do libro e o segundo, sobre o que chaman bibliotecarios do S. XXI.
A Biblioteca Central da Universidade de Vigo é a encargada de xestionar todo o material bibliográfico que chega ós diferentes centros do Campus de Vigo. Na Biblioteca ingresan diariamente gran número de obras non só a través de compra, senón tamén a través de doazóns de institucións e particulares, e tamén dos acordos de intercambio que a Universidade mantén con outras universidades e institucións españolas. Deste xeito acumúlanse moitos duplicados que a Biblioteca oferta as bibliotecas municipais da provincia. Esta iniciativa está a ter moi boa acollida por parte destas bibliotecas moitas veces con escasos presupostos, que ven a posibilidade de aumentar os seus fondos con material de interés, actual e gratuito.
A Biblioteca Universitaria cumple así unha pequena labor de difusión e cooperación coas bibliotecas do noso entorno, colaborando así na formación e información dos usuarios destes centros.
Animamos ás bibliotecas públicas que aínda non coñecen esta iniciativa se poñan en contacto con nos se están interesadas.
Pola súa banda, a Biblioteca Central de Pontevedra conmemora este día cunha exposición retrospectiva da Revista Andaina. Se tés interés no tema, pásate pola biblioteca ou bótalle unha ollada a este documento onde se recopilan unha pequena selección de recursos.
Por iniciativa de Nieves González, impulsora dos blogs da Universidade de Sevilla, estase a elaborar o Mapa de bibliotecas 2.0 de España. Trátase de incluir nesta mapa calquera iniciativa que teña que ver con algunha das ferramentas da web 2.0 : blogs, wikis, chats, etiquetado, RSS, arquivos en YouTube, SlideShare, Twitter, Flickr ... e a presenza nas redes sociais (MySpace, Facebook). Pouco a pouco este mapa vaise enchendo. As bibliotecas da Universidade de Vigo xa están presentes : blogs, wikis, twitter, slideshare, flickr, rss... xa no son ferramentas alleas e ahí estamos, poñendo o noso gran de area nesta cada vez máis grande comunidade.
“El día siguiente a nuestra conversación, Hanna me preguntó qué cosas aprendía en el colegio. Le hablé de los poemas de Homero, de los discursos de Cicerón y de la historia de Hemingway en la que un viejo lucha contra un pez y contra el mar. Ella quería saber cómo sonaban el latín y el griego, y le leí fragmentos de la “Odisea” y de las “Catilinarias”.”
El Lector - Bernhard Schlink
Se che gustou a película, proba a ler o libro, engancharache.
Non, non, na Biblioteca non estamos preparando unha laconada para estes días, pero se cadra ti sí queres cociñar para os teus amigos os típicos pratos da cociña galega de Entroido. Queres facer un lacón con grelos e non sabes cómo?. Necesitas a receita das filloas?, atrevetes coas orellas?. Ainda que non o creas, na Biblioteca Universitaria tenemos a solución. Unha interesante colección de libros de cociña galega está á túa disposición. Corre, que chega o entroido. E se queres… tráenos a proba. Bo proveito!!!
O 12 de febreiro celébrase o bicentenario do nacemento de Charles Robert Darwin (1809, Shrewsbury, Inglaterra) e o 150 aniversario do seu traballo máis coñecido A Orixe das especies.
A OCLC a través de o WorldCat Identities amosa unha particular referencia da súa obra : datos bibliográficos, edicións en distintas linguas, autoridades, etc.
Para os interesados en coñecer a súa vida e obra a Wikipedia pode resultar un bó comenzo da viaxe que poderá continuar, se nos subimos da man da revista "Muy Interesante" para realizar un percorrido interactivo a bordo do Beagle. Se o que buscamos son os eventos e actividades programadas co gallo da conmemoración do seu aniversario, a Sociedade Española de Bioloxía Evolutiva recolle algunhas das citas máis importantes que se celebran en España.
Ó fío do Cumio de Davos, vennos á memoria non só o escenario da reunión anual do Foro Económico Mundial senón tamén o lugar onde se desenrola a novela que imos recomendar : A montaña máxica de Thomas Mann.
E continuando na liña, neste caso, da mal chamada actualidade (xa que o conflito árabe-israelí é vello, demasiado vello), queremos resaltar a novela do sirio Rafik Schami O lado escuro do amorque nos presenta unha cultura marcada por convulsións políticas e relixiosas dende Siria ó Líbano.
Continuando coa temática Cine e ... aberta con Cine e Matemáticas hoxe queremos presentar o libro Cien médicos en el cine de ayer y de hoyde Juan Antonio Pérez Millán, director da Filmoteca de Castilla Y León, e Ernesto Pérez Morán, publicado pola Universidad de Salamanca. O libro empeza coa frase "No hay mejor médico que una buena película"e fai un percorrido pola historia do cine empezando coa película de Robert Wiene "El gabinete del doctor Caligari"(1919) ata "Sicko" de Michael Moore (2007) pasando por moitas películas por todos coñecidas.
Os comentarios das películas complétanse cunha ficha técnica, e o final do libro inclúese un completo índice de títulos e directores das obras seleccionadas.
Todos, incluso os máis xóvenes, temos oído falar da "movida viguesa" dos anos 80. Coñecemos a "Golpes Bajos", "Siniestro Total", "Semen Up"..., pero ¿quén sabe quén son "Los 6 amigos", "Los Zuecos", Los Watios", "Los Diábolos"...?. A música Ye-yé sonou en Vigo nos anos 60-70 tamén con acento galego. Ata 95 son os grupos que Fernando Ferreira recolle no seu libro Crónicas de un Vigo Ye-yé.Anécdotas, entrevistas, numerosas fotografías, etc. compoñen esta entrañable obra na que se percorre parte da historia musical de Vigo da man dos seus protagonistas. Iníciase no ano 1958 cós ensaios dun grupo de xóvenes nos locais de Radio Vigo, e vainos contando os difíciles comenzos destes conxuntos, a búsqueda de instrumentos, de locais de ensaio e actuación, os desencontros coas familias... Agora, trinta anos despois, publícase este libro e máis un CD e DVD nos que se recolle a música e actuacións destes grupos. E para mostra :
O 19 de Xaneiro de 2009 cúmplense 200 anos do nacemento do considerado mestre do relato de terror. Edgar Allan Poe, "o home que nunca sorría" inspirou cos seus relatos a todo tipo de creadores, e a súa herdanza chegou ata nos en múltiples manifestacións. Pintura, música, cine, cómic, televisión, pasando por camisetas, viños, bonecos... e todo tipo de "merchandising" levan o selo das súas sinistras historias. Todos coñecemos series de TV coma "Historias para no dormir", de Narciso Ibáñez Serrador, ou cancións tan populares como "Anabel Lee" de Radio Futura, ou "The Raven" do álbum "Tales of mystery and imagination" de Alan Parsons Project, sen esquecer a cantantes coma Silvio Rodríguez, Bob Dylan e actualmente a opera-rock "El legado de una tragedia" homenaxe ó escritor.
Dende principios do Século XX a inquietante obra poética e narrativa de Poe inspirou numerosos argumentos de películas; xa nos anos 20, o director francés Jean Epstein, e un xoven Luis Buñuel, dirixían a adaptación de "La Caída de la Casa Usher"; a esta seguirían infinidade de películas, moitas de serie B, e moitas dirixidas por Roger Corman.
Os seus poemas foron interpretados tamén por grandes mestres da pintura, estando presente na obra de Gustave Doré e Édouard Manet. Na Biblioteca contamos cun exemplar de "O Corvo" ilustrada por Doré.
A obra de Poe ten espertado a curiosidade de escritores como Borges, Bernard Shaw, Baudelaire ou Cortazar... Todos eles na Biblioteca Universitaria.
Para os máis interesados, internet ofrece innumerables recursos. A wikipedia recolle ampla información sobre o escritor, con mención á súa biografía, as súas obras e á súa influencia en distintas e curiosas manifestacións. Non deixedes de visitar a páxina do Edgar Allan Poe Museum ou a The House of Usher.
A Biblioteca Universitaria de Vigo conta cun importante número de obras, de, e sobre Poe, en varios idiomas, mesmo traducións ó galego, coma a que lles valeu ós profesores Jorge L. Bueno e Ana M. Fernández Soneira o accésit de tradución no Premio 2003 de Relato, Poesía e Tradución que convoca esta Universidade.
E xa para rematar, unha combinación de terror e humor coa versión de "O corvo" na serie de animación "Los Simpson". Espeluznante!!!!
O Concerto de Aninovo da Filharmónica de Viena dirixido por Daniel Barenboim abriu os actos do 200 aniversario da morte do compositor austríaco Joseph Haydn (1732-1809) incluíndo por primeira vez unha das súas obras, o cuarto movemento da “La sinfonía dos Adeuses". http://www.youtube.com/watch?v=BaMCyrdIC2M
Este ano coinciden varios aniversarios musicais: os 250 anos da morte de Händel (1685-1759), referente da música clásica inglesa e os 200 anos do nacemento do mestre alemán Mendelssohn (1809-1847).Galicia tamén ten o seu propio aniversario musical: o de Andrés Gaos (1874-1959), compositor e violinista galego morto hai 50 anos (http://www.andresgaos.com/principal.htm)
Se ben todos terán a súa homenaxe en multitude de concertos, Mercando libros quere facer a súa pequena achega a estes actos, difundindo as obras coas que conta a Biblioteca Universitaria que de todos eles ten unha boa representación.
Entradas
